ஜிம்பாப்வே அணிக்கு ஏமாற்றம்: முதல் டி20 போட்டியில் பாகிஸ்தான் அசத்தல் வெற்றி

நாணய சுழற்சியில் வென்ற பாகிஸ்தான் அணி முதலில் துடுப்பெடுத்தாடியது. தொடக்கத்தில் திணறிய பாகிஸ்தான் அணி பின்னர் நிதானமாக விளையாடி ஓட்டங்களை சேர்த்தது.

இதனால் 20 ஓவர்கள் முடிவில் பாகிஸ்தான் 8 விக்கெட் இழப்பிற்கு 136 ஓட்டங்கள் எடுத்தது.

ஷேசாத் (17), சோயிப் மாலிக் (35), மொகமது ரிஸ்வான் (33), இமாட் வாசிம் (19) ஆகியோர் சிறப்பாக ஆடினர். ஜிம்பாப்வே பந்து வீச்சாளர் சிபாபா 3 விக்கெட்டுகள் வீழ்த்தினார்.

பின்னர் 137 ஓட்டங்கள் எடுத்தால் வெற்றி என்ற இலக்குடன் ஜிம்பாப்வே அணி களம் இறங்கியது. தொடக்க வீரர் மககட்சா (25) நல்ல தொடக்க கொடுத்தார். சிபாவா டக்-அவுட் ஆனார்.

அணியின் வெற்றிக்காக போராடிய தலைவர் சிகும்புரா 31 ஓட்டங்கள் எடுத்த நிலையில் ஆட்டமிழந்தார்.

தொடர் சொதப்பலால் ஜிம்பாப்வே அணியால் நிர்ணயிக்கப்பட்ட 20 ஓவர்கள் முடிவில் 9 விக்கெட் இழப்பிற்கு 123 ஓட்டங்கள் மட்டுமே எடுக்க முடிந்தது. இதனால் பாகிஸ்தான் 13 ஓட்டங்களால் வித்தியாசத்தில் வெற்றி பெற்றது.

இதன் மூலம் 2 டி20 போட்டிகள் கொண்ட தொடரில் பாகிஸ்தான் 1-0 என்று முன்னிலையில் உள்ளது. இரண்டாவது மற்றும் கடைசி டி20 போட்டி 29ம் திகதி நடைபெறுகிறது.