ரிச்சர்ட்ஸ் ஆட்டத்தை பார்க்கவில்லை.. ஷேவாக் அதிரடியை தான் பார்த்திருக்கிறேன்: டோனி வாழ்த்து

சர்வதேச போட்டிகளில் இருந்து ஓய்வு பெற்ற ஷேவாக்கிற்கு கிரிக்கெட் வீரர்களும், பல பிரபலங்களும் வாழ்த்து தெரிவித்துள்ளனர்.

நேற்று தனது 37வது பிறந்த நாளை கொண்டாடிய ஷேவாக், சர்வதேச ஒருநாள் மற்றும் ஐபிஎல் போட்டிகளில் இருந்து விடைபெறுவதாக அறிவித்தார்.

சச்சின்:-

ஷேவாக் பற்றி முன்னாள் கிரிக்கெட் ஜாம்பவான் சச்சின் கூறுகையில், தனது அசாத்தியமான ஆட்டத்தால் ஷேவாக் முத்திரை பதித்தவர். அவர் எப்போதும் தனது உள்ளுணர்வின் படியே ஆடக் கூடியவர். அவர் மேலும் நம்மை மகிழ்விக்கும் விடயங்களில் ஈடுபடுவார் என்று நம்புவதாக குறிப்பிட்டுள்ளார்.

டோனி:-

இந்திய அணித்தலைவர் டோனி கூறுகையில், “நாங்கள் ரிச்சர்ட்ஸ் ஆட்டத்தை பார்க்கவில்லை. ஆனால் நல்ல பந்துவீச்சாளர்களின் பந்துகளை சிதறடித்த ஷேவாக்கின் அதிரடி ஆட்டத்தை பார்த்திருக்கிறோம்” என்று குறிப்பிட்டுள்ளார்.

ரெய்னா:-

ரெய்னா கூறுகையில், ஷேவாக்குடன் விளையாடியது எனது அதிர்ஷ்டம் என்றும், அவருடன் விளையாடிய நாட்களை மறக்க முடியாது எனவும் கூறியுள்ளார்.

ஜாகீர் கான்:-

சில தினங்களுக்கு முன் சர்வதேச போட்டிகளில் இருந்து ஓய்வு பெற்ற ஜாகீர் கான் கூறுகையில், ஷேவாக், எப்படிப்பட்ட பந்துவீச்சினையும் எதிர்கொள்ளக் கூடிய சிறந்த துடுப்பாட்ட வீரராக இருந்ததாக குறிப்பிட்டுள்ளார்.

யுவராஜ்:-

யுவராஜ் கூறுகையில், “தலைசிறந்த வீரர்களில் ஷேவாக்கும் ஒருவராக உள்ளார். அது மட்டுமல்லாது அவர் எனக்கு சிறந்த நண்பர்” என்று கூறியுள்ளார்.

பிரட் லீ:-

முன்னாள் அவுஸ்திரேலிய வேகப்பந்து வீச்சாளர் பிரட் லீ கூறுகையில், “உங்களுக்கு எதிராக விளையாடியது மகிழ்ச்சியளிக்கிறது. சில சமயம் நான் உங்களை வீழ்த்தியிருக்கிறேன். ஆனால் எப்போதும் அது நடந்தது இல்லை. வாழ்த்துக்கள் ஷேவாக்” என்று தெரிவித்துள்ளார்.