முற்றிலும் புதியவர்கள் நடித்த பாதி உனக்கு பாதி எனக்கு என்ற படத்தின் ஆடியோ விழாவில், மறைந்த முன்னணி சினிமாவின் சாதனை கலைஞர்களின் புகைப்படங்களை வைத்து, அவர்களுக்கு இந்த படம் சமர்ப்பணம் என்று ஒரு பேனரை வைத்திருந்தனர். ஆனால், அதில் தற்போது உயிரோடு இருக்கும் டைரக்டர்கள் கே.எஸ்.கோபாலகிருஷ்ணன், திரிலோகசந்தர் என்ற இயக்குனர்களின் படங்களும் இடம்பெற்றிருந்தது.
அதனால், அதைப்பார்த்து விழாவுக்கு வந்திருந்தவர்கள் அதிர்ச்சியடைந்தனர். அதுபற்றி சிலர் சொன்னபோது, அப்படக்குழுவினரும் அதிர்ந்தனர். குறிப்பாக, புதுமுக டைரக்டர் மீது விழாவுக்கு வந்திருந்தவர்களின் கவனம் திரும்பியது. உயிரோடு இருக்கும் சாதனை டைரக்டர்களையும் இப்படி கொன்றுவிட்டாரே என்பதுபோல் அவரை பார்த்தனர்.
ஆனால், அதையடுத்து விழாவுக்கு வந்திருந்த சினேகன் உள்ளிட்டவர்கள் தங்கள் பேச்சில் அதை சரி செய்ய முயற்சித்தனர். குறிப்பாக, கலைஞர்கள் இறந்த பிறகும் வாழ்ந்து கொண்டுதான் இருக்கிறார்கள். அதனால் அவர்களை இறந்து விட்டார்கள் என்று சொல்ல முடியாது. அந்தவகையில், இந்த பட்டியலில் இருக்கும் இறந்தவர்கள்கூட இன்னும தங்களது படைப்புகளால் இந்த உலகில் வாழ்ந்து கொண்டுதான் இருக்கிறார்கள் என்று பேசி ஒருவழியாக சமாளித்தனர்.