இந்திய அணியின் நட்சத்திர பேட்ஸ்மேன் விராட் கோஹ்லியின் நண்பரும், தென்னாப்பிரிக்காவின் முன்னாள் கேப்டனுமான ஏபி டி வில்லியர்ஸ், விராட் ரசிகர்களுக்கு மகிழ்ச்சியான செய்தியை அளித்துள்ளார்.
விராட் கோஹ்லி – அனுஷ்கா ஜோடி இரண்டாவது முறையாக பெற்றோராகப் போவதாக அவர் கூறினார்.
மிஸ்டர் 360 YouTube நேரலையில் இதனை அவர் தெரிவித்துள்ளார்.
சனிக்கிழமையன்று யூடியூப் நேரலையில் பங்கேற்ற ஏபி டி வில்லியர்ஸ், கர்ப்பமாக இருக்கும் அனுஷ்கா ஷர்மாவுடன் நேரத்தை செலவிடுவதற்காக இங்கிலாந்துக்கு எதிரான இரண்டு டெஸ்ட் போட்டிகளில் இருந்து கோஹ்லி ஓய்வு எடுத்ததாக தெரிவித்தார்.
இங்கிலாந்துக்கு எதிரான 5 போட்டிகள் கொண்ட டெஸ்ட் தொடரின் முதல் இரண்டு டெஸ்ட் போட்டிகளில் விளையாடாமல் இருந்த விராட் கோலி, தனிப்பட்ட காரணங்களால் பங்கேற்கவில்லை என்பது தெரிந்ததே.
கோஹ்லி தொடர்பாக ரசிகர்கள் மற்றும் ஊடகங்கள் ரகசியம் காக்குமாறு பிசிசிஐ கேட்டுக் கொண்டுள்ளது.
ஆனால், கோஹ்லியின் தாயார் உடல்நிலை சரியில்லாமல் இருப்பதாகவும், அடுத்த மூன்று டெஸ்ட் போட்டிகளில் அவர் விளையாடமாட்டார் எனவும் தகவல்கள் வெளியாகியுள்ள நிலையில், டி வில்லியர்ஸ் இந்தக் கருத்துக்களை வெளியிட்டுள்ளமை குறிப்பிடத்தக்கது.
யூடியூப் நேரலையில் கோஹ்லி ரசிகர் ஒருவர் டி வில்லியர்ஸிடம்.. ‘ஹாய் சார், சமீபத்தில் விராட் உடன் பேசினீர்களா..? அவர் நலமா? இங்கிலாந்துக்கு எதிரான எஞ்சிய மூன்று டெஸ்ட் போட்டிகளில் கோஹ்லி விளையாடுவாரா? எதுவாக இருந்தாலும் இந்திய அணிக்கு அவர் தேவை…’ எனக் கேட்டார்.
இந்தக் கேள்விக்கு பதிலளித்த டி வில்லியர்ஸ், ‘கோஹ்லி நலமாக இருக்கிறார். குடும்பத்துடன் வசித்து வருகிறார். அதனால்தான் இங்கிலாந்துக்கு எதிரான முதல் இரண்டு டெஸ்ட் போட்டிகளில் அவர் விளையாடவில்லை. ஆம், கோஹ்லி இரண்டாவது முறையாக தந்தையாகப் போகிறார்.
கோஹ்லிக்கு குடும்பம் மிகவும் முக்கியம். அதனால் தான் மனைவியுடன் நேரத்தை செலவிடுகிறார். அதற்கு மேல் எதுவும் சொல்ல முடியாது…’ என கூறினார்.
டி வில்லியர்ஸின் சமீபத்திய கருத்துகளைத் தொடர்ந்து, மூன்றாவது டெஸ்டிலும் கோஹ்லி விளையாடுவது சந்தேகம் என்று அவரது ரசிகர்கள் கூறுகிறார்கள்.
ஆனால் போட்டிகளில் தவறவிட்டாலும், கோஹ்லி-அனுஷ்கா இரண்டாவது முறையாக பெற்றோர் ஆவதால் விருஷ்கா ரசிகர்கள் மகிழ்ச்சியில் உள்ளனர்.
மூன்று வருடங்களுக்கு முன் அனுஷ்காவுக்கு வாமிகா என்ற பெண் குழந்தை பிறந்தது தெரிந்ததே.