வழக்கம் போல் 11 அணிகளை சேர்ந்த 22 வீரர்கள் காரில் சீறிப்பாய்ந்தனர். ஆனால் பலத்த மழை பெய்ததால், ஈரப்பதத்தில் காரை வேகமாக இயக்குவதில் வீரர்கள் சிரமப்பட்டனர். இதற்கிடையே, பிரான்ஸ் வீரர் ஜீலஸ் பியான்ச்சி விபத்தில் சிக்கியதால், 44-வது சுற்றுடன் போட்டி நிறுத்தப்பட்டது.
அப்போது இங்கிலாந்து வீரர் லீவிஸ் ஹாமில்டன் (மெர்சிடஸ் அணி) 1 மணி 51 நிமிடம் 43.021 வினாடிகளுடன் ரேசில் முன்னிலையில் இருந்தார். மேற்கொண்டு போட்டியை தொடர வாய்ப்பில்லை என்று கூறிய போட்டி அமைப்பாளர்கள், ஹாமில்டன் வெற்றி பெற்றதாக அறிவித்தனர்.
இந்த சீசனில் அவர் பதிவு செய்த 8-வது வெற்றி இதுவாகும். வெற்றிக்குரிய 25 புள்ளிகளும் அவருக்கு கிடைத்தது. முதல்வரிசையில் இருந்து கிளம்பி வெறும் 9.1 வினாடி பின்தங்கிய ஜெர்மனி வீரர் நிகோ ராஸ்பர்க் (மெர்சிடஸ் அணி) 2-வதாக வந்து அதற்குரிய 18 புள்ளிகளை பெற்றார்.
நடப்பு சாம்பியன் ஜெர்மனியின் செபாஸ்டியன் வெட்டல் 3-வது இடத்தை (15 புள்ளி) பிடித்தார். இந்திய தொழிலதிபர்களுக்கு சொந்தமான போர்ஸ் இந்தியா அணியை சேர்ந்த வீரர்கள் நிகோ ஹல்கென்பர்க், செர்ஜியோ பெரேஸ் முறையே 8-வது மற்றும் 10-வது இடங்களை பெற்றனர்.
15 சுற்று முடிவடைந்த நிலையில் ஒட்டுமொத்த சாம்பியன்ஷிப் பட்டத்திற்கான போட்டியில் ஹாமில்டன் 266 புள்ளிகளுடன் முதலிடத்தில் நீடிக்கிறார்.
நிகோ ராஸ்பர்க் 256 புள்ளிகளுடன் 2-வது இடத்திலும், ஆஸ்திரேலியாவின் டேனியல் ரிச்சியர்டோ 193 புள்ளிகளுடன் 3-வது இடத்திலும், செபாஸ்டியன் வெட்டல் 139 புள்ளிகளுடன் 4-வது இடத்திலும் உள்ளனர். அடுத்து 16-வது சுற்று போட்டி ரஷியாவில் வருகிற 12-ந்தேதி நடக்கிறது.